黃日華自嘲是個沒有電影命的人，入行以來，他演出佔戲較多的電影只有四部，包括與劉德華合演的《童夢奇緣》。
黃日華說：「上次同劉華合作係十四年前拍電影《五虎將之決裂》，嗰時大家後生啲會玩吓，呢次合作大家冇玩過，全程投入好認真咁拍。影帝喎，同佢一齊做戲有無形嘅壓力，又唔可以用電視方式做，壓力重大，即刻成個人好似冇晒嘢，好似啱啱喺訓練班出嚟嘅初哥咁，但劉華畀心機教我好多嘢，要一路聽佢講、聽佢提。」
被女兒讚感開心
華仔要依劉德華吩咐，會否感到尷尬？他說：「邊個經驗多就聽邊個，拍電視我教番佢都得，清楚自己乜嘢位，唔通電影同佢鬥咩？打保齡我唔夠佢打，踢波佢都唔夠我踢㗎，但佢係好想我好，係佢同電影公司提議我做呢個角色。」
幸而華仔演出贏得好評，至於有否期望贏取獎項？他只說：「拍呢部戲最大嘅期望，係希望啲人鍾意我嘅演出。啲評語都話做得好好，好有新鮮感。我好高興，已經達到自己嘅要求。我個女讚我呀，佢好少讚我！我聽佢哋講會幫我報名（提名男配角），冇所謂，提名入圍都當贏咗。」
不忿輸給羅嘉良
說在影壇奪獎也許急進，但拍劇無數的華仔卻未曾拿過無綫台慶頒獎禮的男主角大獎，因為他只在九七年憑演出《天龍八部》「喬峰」一角被提名過一次，但最後敗在主演《難兄難弟之神探李奇》的羅嘉良手上。問華仔有否覺得飲恨？他淡然說：「冇㗎，睇佢哋（ＴＶＢ）畀邊個啫，講角色難做，《天龍八部》難做好多，又感情戲、又文戲、又打戲，豐富啲，李奇一個性格，大家明白遊戲規則，得啖笑，唔好介懷獎唔獎先，起碼問心無愧，做好角色。獎，唔好強求。」