「大班」一行五人到城中一間最新、最貴、中產客多之餐廳食晚飯，一坐低就覺得張枱太細、太窄，唔適合五個人坐，於是向侍應投訴，侍應冇乜表示，之後向一位着黑衫嘅年輕女士投訴，女士只係話：「呢張係五人枱。」大班為之氣結，叫佢搵經理嚟。女士話：「我就係經理！」大班唔客氣咯，一輪攻勢，女經理招架不住，走咗去搵洋人，不知洋人是甚麼身份，總之講完一輪，就立即請大班等人坐過隔籬一張大枱，舒服晒。
擾攘一輪，可以點菜嘞。男侍應行埋嚟take柯打，大班講：「頭盤要乜乜乜……」未講完，男侍應好似好醒目咁話：「呢個要一千蚊，加乜乜就一千二……」大班忍唔住，立即塞錢入佢袋：「且慢，外國一流餐廳嘅餐牌分兩款，畀請客嘅主人家睇嘅餐牌，就有價錢，客人嘅餐牌，係冇價錢嘅，以免客人點菜時覺得唔好意思。呢間餐廳格調咁高，入得嚟就預咗價錢唔平，我哋使乜你講埋價錢出嚟，咁冇禮貌！」
大家食完晚餐，覺得幾滿意，大班啲老人家脾氣發作，又請女經理與侍應行埋嚟：「我唔係奄尖，只係想話畀你兩位年輕人聽，一流餐廳需要一流服務，如果你一開始就講：好對唔住，今晚客滿，請你坐住呢張枱先，我哋一陣再想辦法。咁我就會勉強接受，但你一開始就講：呢張係五人枱。十個客人九個聽咗都會谷氣啦……」兩位年輕都幾聽話，多謝而去！
左丁山笑大班久無聽眾，食飯都要講道理，不如去酒店學院做兼職教授啦！大班話：「非也、非也，𠵱家啲新派豪華酒店請咗唔少飲過洋水嘅富裕家庭子女做夥計，呢班少爺、千金讀書讀得多，酒店餐飲管理方法，倒轉頭都識背，但服務人客就好欠缺實際待人接物之道，故此本身雖然係叻仔叻女，做起嘢嚟就令人客唔舒服，唔教吓佢哋唔得。」