肥龍噚日笑口噬噬出席立法會內會會議，佢咁輕鬆，連旁邊嘅孫公都變得寬容，反而何志平就小心翼翼，好似小學生考試咁。老許同孫公話晒一場舊同事，梗係夾檔啲，所以一個講，另一個就猛咁點頭話啱聽。
肥龍養精蓄銳，一日跑三場都唔攰，但係內會副主席李華明就打晒「喊怒」，主席劉健儀好幫手，吳靄儀想問政改，咪排尾問，都冇晒火花啦。
肥龍唔開記者會，但係就見傳媒高層，大家問呢位歌劇發燒友西九點解冇音樂廳，佢話係冇，以香港嚟講，音響最好係大會堂，荃灣大會堂都唔錯，所以香港管弦樂團都喺荃灣錄音，文化中心就唔多好。
肥龍成日周圍去聽歌，佢話最好係波士頓嘅Tanglewood；阿姆斯特丹、伯明翰以及曼徹斯特都唔錯；悉尼歌劇院呢？佢就擰擰頭話唔掂。
傳真︰2623-9278
電郵︰[email protected]
