徐子淇及陳嘉容等昨日在中環出席手袋宣傳，徐子淇近期狂煲韓劇解悶，更因而略有增磅，她指港女纖體風氣不可長，對健康有不良影響之餘，男人亦不喜歡女友過瘦。
創於一八五六年的英倫皮具品牌TannerKrolle，一直深受英國皇室歡迎，近年更獲莎朗史東（SharonStone）、BritneySpears和辛康納利（SeanConnery）等荷李活明星愛戴。今季由HarveyNichols獨家引入香港，昨日請來徐子淇、陳細潔及陳嘉容在中環店出席宣傳活動，各自挑選限量版新款手袋。
眼利揀中筍袋
徐子淇眼光最敏銳，一眼便揀中一個全球限量發行十個的金色壓鱷魚紋手袋，她大賣口乖說：「我有HarveyNichols情意結，喺英國讀書五年成日去行，返到香港去過幾次，次次都俾記者影到，真係要化晒妝先好去。」
徐子淇透露近期狂煲韓劇解悶，亦略有增磅，她說：「我唔擔心，我覺得香港𠵱家啲風氣唔好，女仔一味鬥瘦，好似愈瘦愈靚咁，其實咁樣唔健康，男仔都唔會鍾意女朋友太瘦。」她表示品嘗一頓豐富晚餐或美味朱古力，能令自己心情大好。
陳細潔即入貨
提到工作，徐子淇透露稍後要返內地拍廣告，令她非常苦惱，徐子淇說：「我見過小朋友當街去廁所，又試過俾人放飛劍（吐痰）落鞋面，好恐怖！」此外，陳細潔獲贈手袋外，亦即場入貨，她又表示堅拒男友為她拎手袋，陳細潔說：「好核突，好似男友食拖鞋飯咁，我啲男友好man，從來冇做呢啲嘢！」
採訪：RitaLeung
攝影：RickyChan
