隔晚紐約期金升5.7美元，上到475美元，直撲9月尾高位477.80美元。本港同金價掛鈎嘅股票，得隻紫金（2899），昨收2.575元，升4%，做咗是日升幅最大嘅國指成份股。
紫金冇C輪冇P輪，睇好睇淡都冇法子喺紫金窩輪身上搵食。黃金窩輪則共有4隻，C與P各兩隻。
黃金C輪：黃金C輪有4847與4966兩隻。4847下月尾夠鐘，昨收36仙，升3仙，執筆時溢價0.7%，槓桿率8.4倍。黃金窩輪與滙價窩輪一樣，收市後金市同滙市冇停到，繼續有上落，所以黃金窩輪溢價亦一直在變。
4966年尾夠鐘，昨收53仙，升6仙，溢價2.5%，槓桿率13.8倍。黃金窩輪有效槓桿率與引伸波幅，搵唔到參考數字。
如果睇好金價，兩隻輪中，揀4847着數啲，不過好難買賣。鬼咩，街貨得2.95球，昨日成得62萬份。要出入快趣，不如直接炒金，個個位有得成。金價升得急，提防有回吐。
黃金P輪：黃金P輪有4851與4970。
4851收3.7仙，散26%。下月尾夠鐘，溢價6.6%，槓桿率123.8倍。金價跌唔落445美元（即隻輪嘅行使價）以下，揸隻輪會輸清光。要個零月內金價大跌30美元，隻輪先至唔使作廢，睇嚟凍過水。4970冇成交，1仙求售。年底到期，嘩，槓桿輪1017倍。冇用嘅，年底金價跌唔到390美元以下，隻輪作廢。
炒黃金C輪與P輪，好難搵食。發行商都係，因為好少買賣。
章盛