日本名漫畫家鳥山明嘅《龍珠》長出長有，人氣度多年從不減！而在不同世代的遊戲機之上，不下出過數十款遊戲，最近BANDAI在PS2上新推嘅《龍珠ZSparking!》，絕對有機會成為經典！集合晒咁多集漫畫內容加人設，連由孫悟空同比達結合而成嘅格比達都會登場，小記一向都係《龍珠》迷，真係從未見過咁齊人！另外不得不提係新增嘅ZBattleGate模式，有150個經典劇情戰事，俾你任演正派、反派打餐飽，真係好似睇緊原著漫畫咁緊湊！
記者：許福合
遊戲資料
主機：PS2
開發：BANDAI
類型：動作
人數：1-2人
售價：$495
立體格鬥似睇動畫
《龍珠》同《機戰》一樣，都係受歡迎嘅動漫，基本上推出遊戲都會受到Fans注意，今次《龍珠ZSparking!》將咁多集《龍珠》人物集合起來，更係唔少Fans收藏目標！
今次《龍珠ZSparking!》嘅CGOpening絕對係值得一睇再睇；特別之處係唔再「單調」咁用番動畫片段，而係以2D動畫作底稿，改以全3D動畫製作而成，雖然一眾《龍珠》Fans睇落可能有啲唔慣，不過畫面質素可以睇到絕非「行貨」！
遊戲進行時，主要都係進行格鬥戰為主，由於《龍珠》角色都可以飛天落地，所以場景亦設定為立體戰場，不過最令人振奮者，係同大家睇漫畫、動畫一樣，一個波打落個山到，分分鐘會將佢移為平地，加上戰鬥前、後亦加插了好多連對白嘅動畫片段，旁邊睇就好似睇緊「最新一輯」《龍珠》一樣！
經典場面收集龍珠
《龍珠ZSparking!》更係對Fans一個大考驗，新增嘅ZBattleGate模式，玩家可以選擇動畫內經典場面進行戰鬥，喺呢個模式下，一開始會見到波波走出嚟帶領玩家重溫各場經典戰事，玩家唔能夠亂用角色，只可使用劇情當中會出現嘅固定角色出戰，例如孫悟空對菲利一場，就只能揀番原著曾出現嘅角色；今集所收錄場面總數，據資料顯示會多達150個，由《龍珠Z》、《GT》到近期幾輯劇場版都有收錄在內，所以除非你係超級Fans，精通《龍珠》故事，否則幾難分得清楚。
除咗一味戰鬥，另一個必玩當然係搵龍珠模式，透過龍珠雷達要最快收集齊七粒龍珠，部份龍珠可能要經過戰鬥或破壞建築物先見到，當集齊七龍珠重可以呼叫神龍，有機會獲得特殊道具！
活用特技武道大會
由於今集連劇場版人物都會包括在內，所以戰鬥時變化都多咗唔少，尤其招式變化更係多花樣！先講戰鬥時，要不時注意三種不同數值，「體力計」當然代表角色生命，而「氣力計」就係角色可以使用的「氣」，要使用各種氣功就要靠佢，戰鬥時可以用L2來「谷」氣，另外重有唔少得，破壞力驚人嘅「必殺技計」，如太陽拳、界王拳等招式，一般分3段，儲滿就可以出招，照筆者試玩時發現，氣功雖然比普通招式傷害較高，不過講到最致命，必定要數必殺技，打中的話分分打掉對方大半血，相當勁抽！
不過無論招式幾勁，都要打得中先有用，喺一般場景下，使用必殺技要注意時機，但如果轉打天下武道大會，由於場地所限，中招機會將大增，對鍾意打得勁打得爽嘅玩家，武道大會亦可以好過癮。另外，可使出合體技，如有最強戰士之稱嘅格比達，係由超西4嘅孫悟空同比達結合而成，擁有二人技能，戰力驚人，不過結合時間超短，使用時要注意。
