煲呔份處女施政報告下個禮拜出台，強政點樣強勵治點樣勵，到時大家就一清二楚。其實煲呔心中有數，要強政一定要有個強嘅班底，否則只會落得如董先生般，搵埋啲馬仔嚟譏笑自己「有辱無榮」「三零部隊」。所以早喺競選之時，煲呔已揚言要改組行會，除咗三司之外，其他局長冇事就唔使嚟開會。
港英時代，行會係重量級。董治時代，行會變咗羽量級。煲呔身在其中，又點會無切膚之痛？佢想改革，奈何阿爺忽然話要締造和諧，一個都不能炒，部份局長亦好大反應，話開會大過天，喂，我哋都宣過誓加入行會噃，成員就係成員，無理由分開做「有會開成員」同「冇會開成員」啫。一時之間，群情洶湧。
煲呔見叮人唔走，於是變招玩攤薄。𠵱家非官方成員有七件，三司十一局加埋，一共二十一名，咁搵多六七個入去，到時成三十人，班唔聽話嘅友仔，咪叫佢坐埋一二角。
呢一招都幾高，但係遇到一個好大嘅難題噃。咩呢？就係行政會議個場，點夠咁多人坐呢？唔通叫佢哋好似茶樓搭枱咁，擔啲圓櫈嚟咩，況且班友好多都好似肥平咁嘅身材，李國章咁威猛，到時佢哋衝地鐵咁爭櫈仔坐，成何體統？
煲呔最憎人洩密
於是行會要增加新成員，首要問題唔係搵李國寶定鄭海泉，請范鴻齡定張建東，而係要搞掂櫈嘅問題。早前有風傳話想請番振英哥做召集人，睇嚟就係煲呔唔想煩，等振英做班長，防止班小朋友爭位坐。
講開行會，煲呔梗係要各人宣誓高舉保密制同集體負責制，因為佢老哥最憎人漏料畀傳媒，連議程都唔得，簡直係死罪，可惜佢班內閣成員唔少係大口仔，成日放風；加上咁多人知，點保密呀？
八方係傳媒人，當然無任歡迎有風吹，不過最緊要公平啲，唔好成日吹東風，有時都吹吓南風西風同北風。
八方聽聞，班尊貴議員亦好唔高興猛咁嘈，煲呔更大興問罪之師，結果咪所有司局長喺呢五日封晒口囉，如果再有施政報告料爆，就真係要捉鬼，肥龍同煲呔自己都要小心啲先至好。
傳真︰2623-9278
電郵︰[email protected]