呢個世界總有異類，好似鄭大班咁，以前日日喺電台為民請命，大罵啲高官，噚日又係立法會取笑尖沙嘴文化中心嘅建築似公廁，卻原來佢唔識講京話，聽都唔係咁掂，將來見到京官，想鬧都唔得。
八方問大班乜咁瘀，去珠三角要勞煩鄺志堅做繙譯，佢就掉轉頭恥笑達仔扮識講普通話，好難聽；長毛同張德江講正宗京話，就全冇問題喎。
於是八方就好好心咁話介紹位普通話老師畀佢，點知大班猛話千祈唔好，原來佢十年前都學過，但因為冇興趣所以學唔成，反正佢話自己從政到此為止，冇準備更上一層樓，冇諗住做特首或高官，所以毋須同京官打交道，所以唔識普通話都冇乜問題喎。
至於大班之友煲呔就進步明顯，「畀我做特首，我都有心機學啦。」
大班出名支持政府，不過佢都向八方投訴政府冇人搵佢傾政改，「好似十拿九穩咁」；連大班都出聲，睇嚟肥龍都要急急請各尊貴議員去禮頓山tea吓啦。
傳真︰2623-9278
電郵︰[email protected]