今個周末，會展有個世界地產博覽展，滙集三十個國家七十幾家參展商，除咗歐、美、澳洲及東南亞地區，中東杜拜都有幾個大項目，值得睇吓。
項目大成點？例如香港建築公司巴馬丹拿都有份參建嘅亞拉伯之城（CityofArabia），佔地二千萬呎，發展樓面四千幾萬呎，○八年分批落成，預計完成發展後，可以容納四萬幾人。裏面有個比香港迪士尼樂園大五倍嘅恐龍主題公園。聽主辦單位講，最平嘅千五呎兩房住宅，大約二百萬有交易。
杜拜○八年落成嘅全球最高商住酒店項目BurjDubai都有參展，一百五十四層高嘅大廈，據講真係高聳入雲，最高嘅寫字樓及中層住宅，都可以分拆出售，價值係展覽場裏面數一數二咁貴，最低十層已經畀GiorgioArmani買咗，準備開佢哋全球首間酒店。