唔好以為淨係基仔同千嬅至可以攞傑青，其實狗隻對人類亦有好大貢獻，做到好多能人所不能的事，重分分鐘可以救你屋企人一命。由動物醫生所舉辦的《香港傑出狗隻大獎》，就特別嘉許對巿民有超凡貢獻的狗隻，今次就搵嚟當中3隻「傑狗」做訪問，睇吓佢哋有咩值得同傑青佢哋一拼先！
記者：曾靜茵
攝影：譚盈傑
鳴謝：動物醫生
屋企有隻狗醫生
現時還是實習動物醫生嘅Dr.Michael，同其他狗一樣咁貪玩，最叻就係執水樽，貴為傑出狗隻，叻在佢做咗主人一家嘅家庭心理醫生，令Willie一家生活過得開心又快活。
Willie5年前曾因財政、工作以及婚姻亮起紅燈而患上情緒病，就喺醫生建議下，選擇動物治療，就係因為咁而開始養Michael。「我覺得動物係可以推動到人與人之間的溝通橋樑，藉住每晚同Michael出去散步，令我開始漸漸放鬆心情，唔再鑽牛角尖，而呢2年裏面，佢嘅成長就等於我嘅康復。」似千嬅做護士咁神聖。
喺一次野外定向比賽中，Michael曾因中暑而幾乎做唔成傑狗，這件事令Willie體會更多，「嗰日送佢去醫院，嘔、失禁、危殆，而小朋友還不斷問：『爸爸，Michael會唔會死㗎？』嗰一刻感受深刻，令我更珍惜生命，所以Michael出院之後，我就決定同佢一齊投入動物醫生服務。」
Dr.Michael
品種：拉布拉多尋回犬
性別：雄性
年齡：2歲
身份：動物醫生
最叻扮公仔𠱁人開心
抱上手成隻公仔咁嘅西施犬Dr.Amour，唔好睇佢眼仔睩睩鬼咁精靈就以為佢年紀尚小，查實佢今年已經14歲，可稱得上是婆婆級人馬。貴為最資深的動物醫生，佢6年嚟到訪30間以上唔同機構，足迹遍布香港好多間醫院、護老院同智障人士中心，探訪時間超過300小時，似足劉華咁勤力。𠵱家重榮升為動物醫生顧問，認真巴閉，今年榮獲「動物醫生榮譽大獎」可謂實至名歸。
8年前被前主人遺棄嘅Amour，幸得現任主人劉氏一家收養，佢性格乖巧文靜，深得眾人歡心，而佢最擅長就係郁都唔郁扮公仔。唐芷茵話：「記得有次去老人院做探訪時，有個婆婆好怕動物，起初都唔肯接觸Amour，不過見我抱Amour抱到好似BB咁，就覺得好得意，最後重抱住佢唱住歌仔𠱁佢瞓覺㖭！」
Dr.Amour
品種：西施犬
性別：雌性
年齡：14歲
身份：動物醫生
義犬報恩
15年前，呂小姐在西貢路上遇見當時只得2個月大嘅流浪狗Momo，當時見佢一副可憐嘅樣，便決定收養佢。唔好以為動物醫生先可以成為傑出狗隻，作為家庭犬嘅Momo同樣表現出色，無師自通學會了看護犬嘅本領，曾經2次拯救主人嘅媽媽，讓患有心臟病嘅婆婆及時送院救治。
「我媽媽80幾歲，同時患有失聰和心臟病，Momo平時唔會吠，不過若有人到訪按門鈴，佢就會識走到我媽媽面前吠，叫我媽媽開門。而Momo佢亦好醒目，曾經救過我媽媽兩次，第一次係舊年10月，有一晚我媽媽好唔舒服，又暈又嘔，全靠Momo吠醒我，我先可以及時送媽媽入院。第二次就係上個月8號清晨，我媽媽突然中風喺廁所跌低，Momo又立即吠醒我，等我可以立即幫我媽媽按摩同送佢入院，若果再遲一步，恐怕就會有生命危險。」
Momo
品種：混種唐犬
性別：雌性
年齡：16歲
身份：家庭犬
傑狗兵團外訪
