行山人士出事，出動直升機、警務人員、消防人員去搜尋，完全正確，因為人命關天，任何負責任嘅政府都要咁做，否則俾人民鬧死。出事遇救還算事小，最慘情及不幸嘅就係不知所終，及死於野外。
救人係重點，但一單男青年考童軍金章而死於荒山上嘅新聞，某些傳媒及評論員嘅重點就比較奇怪，佢哋拉開「戰線」，指責流動電話網絡商唔設法令到手機通訊通暢無阻，又鬧政府監管網絡商不力，實在令人感到奇怪。大佬呀，如果你一個人走上八仙嶺一個山頭遇上危險，用手機電話求救，打唔通，鬧電話網絡商之前，唔該首先反省一下，何解你會置身於險地？有冇人用槍指住你個頭挾持你去，丟下你不理？你自己選擇去行山而唔去游水或者打波之前，有冇諗到做足一切安全措施，抑係只帶一個手機，有事就搵人？
所有人必須為自己行為負責，個人安全係個人嘅最大責任，冇得推卸。記得我哋讀小學之時，點止冇手機，屋企裝個電話都要畀茶錢，嗰陣成班小學同學去爬獅子山，由九龍塘畢架山起步，上到山頂摸吓獅子鼻，落沙田紅梅谷為終點，再行去沙田墟火車站，邊度有手機傍身咁好彩。
手機係先進科技，用得到之時，梗係方便啦，去行山遠足，一定要帶備，但不應喺打唔通之時，就怨天尤人，連政府都鬧埋。須知全世界有好多地方都係民用手機嘅盲點，要全面覆蓋，成本甚大。如果有人要求曾蔭權下令撥款在所有全港山頭野嶺設立無線電話網絡嘅話，曾特首會面對一個選擇問題，將筆錢用於救生員身上或是更新消防員救生設備上，是否會令更多市民得益，筆錢用得更有效益？
有啲人行山，追求山上寧靜，唔想聽到手機聲響。日本人甚至搭火車地鐵，都唔准打電話，但一啲香港人入到戲院都要講電話，上晒癮，冇得好講。