大市勁跌兩日後，昨日總算喘定。黃金周已經結束，據報期間本港零售業生意冇預期咁勁，所以好幾隻零售股都受壓，例如卓悅（653）就跌咗5.05％，收2.35元，莎莎國際（178）亦跌3.55％，收3.40元。
不過堡獅龍（592）因為獲美林品題及唱好，股價勁升14.68％，收1.25元，成交股數2197萬股，金額2639.8萬元。經紀黃話，早排大家唱淡零售股，同埋堡獅龍有董事出嚟沽貨，股價一度跌落1.08元水平，至52周低位。但由於堡獅龍size細，一旦有人唱好，隻股即刻趁機大反彈。
經紀黃又話，佢仍然睇好利福國際（1212），一來隻股家陣仍然低於早排的配股價12.55元，有一定值博率；二來公司近期動作多多，崇光尖沙嘴分店上周開幕人頭湧湧。雖然有人話，新舖新簇簇自然多人到，要等多一陣先至見真章。但唔好忘記，好快又到聖誕節，又係shopping好時間，點計都對公司有利。利福昨日微升唔夠1％，收12.15元。
慕容小初