肥佬Ｌ突然來電，話去鏞記食午飯，益吓左丁山。碰啱當日有定期飯局，偶然可以缺席，而且肥佬Ｌ請食飯，一定有好嘢，點解唔去呀？但係肥佬Ｌ自己竟然都唔知去鏞記邊層樓，惟有走到地下問一問：「Ｌ先生訂枱！」知客十分醒目，即刻話：「哦，即係食家Ｃ嗰度啦，請上四樓。」
四樓有房間寫住Ｌ先生，隔籬間房就寫得十分清楚，驚死來賓睇唔見，就係勞工局張建宗先生，如果《蘋果》李八方喺度，以佢嘅八卦性格，一定想知道張秘書長請邊啲人食飯。左丁山就唔理咯，推門入內，食家Ｃ已在，有四位客人㖭，肥佬Ｌ駕到，入座坐低，原來重要等埋漫畫尊與甘老闆。嘩，呢餐勁咯，有甘老闆在，又有食家Ｃ射住陣腳，點會冇水準，果然，一個「原羊頭腩清湯煲」，一個「一品滷水鵝煲」，一個「鵝油冬菇清湯」，食到左丁山失聲咁滯，平時根本唔識點呢啲菜，未食過。甘老闆解釋一輪，食家Ｃ補充材料，先知道簡簡單單嘅材料，可以做得咁美味。食家Ｃ係專家中之專家，未夠喉，重要點多兩樣，「膶腸臘鴨髀」、「董事長腐乳」，食家Ｃ話：「嗱，一啲嘢要有秋風先至好食，聽日就有秋風到，可以食大閘蟹、臘味嘞！」左丁山頻頻點頭，猛咁食，一路飽到晚上九點，先至食晚飯。
食咁多「鵝油」為基礎嘅食物，怕唔怕呢？跟食家Ｃ就冇有怕，佢飲濃到近乎黑色嘅普洱，消滯減肥，左丁山一於有樣學樣。不過問肥佬Ｌ一句：「你唔怕膽固醇咩？」食家Ｃ代答：「又唔係日日食，飲紅酒可以解晒啦！」
漫畫尊寡於言、精於畫，甘老闆嘅卡片好特別，兩面都有佢嘅彩色漫畫肖像，極之傳神，原來就係出自漫畫尊手筆，搵日請漫畫尊替左丁山畫番一張就認真趣致。正是快活不知時日過，食到下晝三點，肥佬Ｌ話要趕住返工，於是一齊鬆人。