郭芯其日前到郊野公園拍廣告時，頻頻被水曱甴和蚊螆偷襲，工作人員笑言因她的肉夠香甜所致。郭芯其又自爆曾在街上望着妮歌潔曼的海報入神，險些被車撞倒。
郭芯其近日獲邀擔任Zino眼部護理產品代言人，原本她要到郊野公園拍廣告照，但多次因打風和天雨關係而改期，令她好不擔心，郭芯其日前說：「因為打風關係，拍攝日期足足改咗幾次，改到第四次之前嗰晚，我因為擔心又要再改期，結果搞到好緊張，好難先至瞓得着，好在最後都能夠順利完成。」
躺在濕𣲷草地
拍攝當天，導演要求郭芯其躺在郊野公園草地上擺甫士，工作人員見草地有點濕，遂在地上鋪上絲巾，沒料到郭芯其身形高大，絲巾只夠她墊到小腿位置，由於雨後昆蟲非常活躍，結果拍照期間，郭芯其的小腿頻頻被水曱甴和蚊螆偷襲，咬到又紅又腫。
郭芯其說：「成班人當中淨係我一個被咬，工作人員就講笑話因為我啲肉夠香甜，先至吸引啲水曱甴同蚊螆，真係俾佢哋激死！」
險為妮歌撞車
郭芯其拍攝眼部護理廣告，問她覺得哪位藝人眼睛最漂亮時，她說：「NicoleKitman（妮歌潔曼），我覺得佢對眼好靚，好有神，望住佢對眼時，好似有說話要講畀你知咁。記得有次喺街度見到佢張大海報，我因為望到入晒神，差啲俾車撞親。另外梁朝偉對眼都好迷人，好有魅力，睇到個心卜卜跳！」
