街邊篤魚蛋、牛丸、芝士腸‥‥‥除學生哥勁啱之外，不少上班一族放工後都不顧儀態地拮埋一份，不論男女老幼，都抵擋不了這股港人街頭飲食文化。想找一家可以坐定定慢慢歎港式串燒店？有！全香港可能只有這一家—即揀即燒的「BBQ」港式串燒專門店來也，連老外都話Nice！
記者：盧家蕙
攝影：陳智良
Model：YoYo（FromSalvador）
開店未夠一年 搬大舖
位於西營盤的「BBQ」，於上年10月1日開張時，舊店僅有七、八個座位，生意好到做唔切。今年8月13日成功搬舖，雖然比舊店大了少許，但客似雲來的情況令小店顯得更細小。有同事（西營盤街坊）叫小記點都要去睇睇：「佢哋啲嘢真係好食，而且舖面成日迫滿人，有時重要排隊。唔知係咪見佢生意好，BBQ搬走後，舊店位置都開咗間串燒，不過生意就真係無得比。」現址座位只有十多個，想霸個靚位慢慢歎就要撞彩了。
爆炸頭兩口子、Billy兩夫婦，合共四人，就是這小店的老闆。Billy說：「我們都做得幾辛苦，兩個男人圍住三個爐不斷燒，唔停得手；兩位太太也忙到踢晒腳，買材料醃肉、煲粥、煲涼茶等，晚晚凌晨先唞一唞，試過凌晨三點幾先可以食啖飯咋！」雖然做得辛苦，但見生意蒸蒸日上，食客由街坊、學生、遠道而來的老饕、以至特意揸車來買外賣的人，看見大夥兒嘻嘻哈哈又一天，老闆亦樂此不疲了。
此店的串燒有29種，海產類燒烤近十款，加上其他小吃，種類之多令人花多眼亂。當你看到串燒紙的價目時，由大眾化的$2一串腸仔，至$6一串矜貴鴨胸，更是叫你剔到停唔到手。加上醃料只用豉油、糖，再以鹽燒，食到材料的原汁原味。想花巧點，可要求老闆塗上自製沙嗲醬、泰式辣汁，加多點蜜糖牛油又得，又是另一番風味。
鴨胸$6
鴨胸入口鹹香惹味，甘香不肥膩，以牛油蜜糖燒過更是香口。6蚊有3件矜貴厚身鴨胸，重想點？
燒茄子$5
茄子軟軟的幾乎入口即溶，多汁而又充滿焦香，趁熱吃味道更佳。
西冷牛扒$7
高檔西冷牛扒，質素不比幾十蚊一件的差，燒至七成熟就最能保持肉質嫩滑，汁燒更惹味。
螺肉$7
煙韌爽口的螺肉，鹽燒令鮮味突出，蘸上泰式辣醬更辛辣刺激，別有一番風味。
魚片頭$7
一向認為魚片頭是整條魚片的精髓所在，燒得特別金黃香脆，甜甜的蜜糖鎖住魚汁，咬落彈牙不多粉，Billy說：「是貨真價實的『四海魚蛋』來的！貴街邊嗰啲好多㗎！」
雞髀菇$5
燒鮮菌獨有的清香令人陶醉，輕輕烤熟可保留養份，亦能突顯材料本身的鮮味。
煙肉車厘卷$10
煙肉燒過後乾身，卷着鮮甜多汁的車厘茄，不但中和了煙肉的油膩感，而且食落Juicy，口感更佳。
燒大蝦時價$20-$28/隻
鹽燒重量級大蝦，燒得恰到好處，味道特別鮮美，肉質實淨，可以啖啖肉，幾爽！
食客有Say
BBQ
地址：西營盤第三街142號（近薄扶林道）
電話：25489880
營業時間：3:00pm-12:00mn
收費：加$5可配白飯，穿着校服之學生，每串可獲減收$1（腸仔除外）
