今日返到公司，氣氛有啲唔同，老闆仔Brian今日正式上任做AGM，24歲仔大學畢業，第一份工就擔此重任，實戰經驗等於零，新官上場三把火，難怪啲老頭子唔多服氣，不過為咗保住份工，大家都打醒十二分精神。
入到茶水房，已經見到Janet同阿John喺度呻，話Brian今日問埋啲白癡問題，都唔知點答佢好，阿John重加多句：「未學行先學走，一定死梗。」今次John又冇鬧錯喎，有兒科專家話，BB沒有或爬行練習不足，會導致對稱頸緊張反射動作不成熟，會引起行路姿勢及肌肉張力不協調，動作遲緩等。呢類人成長後會特別容易有挫敗感、情緒不穩，又唔曉變通，嚴重嘅會有學習及聽寫障礙，難以集中精神。Janet即刻搭訕：「呢啲徵狀Brian全部都有喎！」大家哈哈大笑，轉身諗住打電話叫菲傭收起部學行車，點知就見到Brian企喺茶水房外面，塊面黑晒。睇嚟，今年都唔使旨意有人工加了。（十）