陳淑蘭（蘭子）早前趁着接受腳筋手術前，與名模周汶錡（Kathy）到了美國洛杉磯公幹，周汶錡並充當蘭子的「人肉時裝指南」，帶蘭子四出購物。
陳淑蘭和名模周汶錡早前結伴到美國洛杉磯公幹，她們寓工作於娛樂，四出瘋狂購物，結果二人都滿載而歸。
碌爆兩張信用卡
蘭子大讚周汶錡是一位旅遊好伴侶，因為周汶錡是模特兒，擅長扮靚，她的時裝貼士又緊貼潮流，所以蘭子可以視周汶錡為「人肉時裝指南」，她說：「我都有同Kathy講話要喺佢身上吸晒啲扮靚心得。」
蘭子完成這個旅程即返港為右腳做駁腳筋手術，其實行程之中，她的右腳已腫如「豬蹄」，可是她拐吓拐吓仍到outlet去瘋狂購物，蘭子說：「我見到啲高踭鞋好平，就一口氣掃咗九對，不過喺鞋舖樓上，我一個人拎唔到咁多盒，我咪向一名外籍男士求助，我同佢講我『跛咗』，佢可能覺得點解一個跛妹都買咁多高踭鞋，用好奇怪嘅眼光望住我。呢次我買咗好多嘢，重碌爆咗兩張信用卡㖭！」
健步如飛惹懷疑
周汶錡對於蘭子的讚許，她說：「多謝佢啦！可能我成日去美國旅行，我都好熟去邊度買嘢，所以我都樂意做佢嘅嚮導。」周汶錡還取笑蘭子雖然負傷旅行，但一到購物中心，就即時健步如飛，周汶錡說：「我好懷疑佢呢次做手術唔係駁番條腳筋，而係駁長啲雙腳做『長腿姐姐』。」而周汶錡與蘭子分別後，自己繼續去了拉斯維加斯。
採訪：比華利
