內地小生李亞鵬因為娶咗王菲呢位天后級老婆而令知名度三級跳，雖然佢曾經拍過多部內地電視劇，但算唔算受歡迎就見仁見智。近日網站搜狐網就搞咗個厭惡明星Top20排行榜，李亞鵬竟然登上冠軍寶座。
網友解釋李亞鵬衰嘅原因，除咗緋聞太多之外，就係佢拍攝內地劇《笑傲江湖》同《射雕英雄傳》都令人失望，網友好抵死咁話李亞鵬嘅劇中表現，係向觀眾展示木頭係點樣煉成嘅，重將儍氣十足嘅郭靖演繹成癡呆咁款。
章子怡入圍
至於榜上屈居亞軍嘅就係劉曉慶，因為網友受唔住一個姥姥夠膽扮清純。而周杰倫就排第三位，理由係頂唔順佢自以為好靚仔，希望佢能夠保持低調，其他入圍嘅厭惡明星，重有張衛健、馬景濤、章子怡、趙薇、林心如、范冰冰同胡兵等。
雖則被選為厭惡明星榜首，不過李亞鵬一於少理，繼續同王菲喺重慶縉雲山放緊悠長假期，日前有人就拍到佢哋喺當地一間極偏嘅私家院落中出現嘅照片，李亞鵬重喺院落露台上伸懶腰，其後二人離場，但竟保持相隔成條街嘅距離，如果唔係認得出佢哋係王菲同李亞鵬，怕且點講都冇人信佢哋係兩公婆。
