自從中科環保（351）同埋中國環保電力（290）出事後，金魚缸內的細價股，當堂有嘢都唔敢做，搞到周圍靜英英。經紀陳話，班炒家見呢單新聞搞到咁大，連圈中大水喉都被波及，家陣風頭火勢，當然要避避鋒頭。
好彩重有幾隻大型IPO搞緊上市，如果唔係，小初真係唔知點樣過日子。
另外，半新股繼續有唔錯表現，由中國海外（688）分拆出嚟嘅中國建築（3311），係以介紹形式上市，將股份分畀中國海外股東，因此上市初段，有小股東諗住係送嘅，而且數量唔多，所以即時沽出套現，令股價受壓，但之後股價就愈升愈有，最近重屢創新高㖭。
經紀黃話，隻股一直有大隻佬收貨，收齊貨之後，自然要升就升。
基本因素方面，隻股8月份公布中期盈利有3198萬元，但老總一早放風，話上半年盈利未計6月收購的管理集團收益，計埋嘅話全年盈利超過成億銀。
中國建築昨日升4.97％，收1.48元，成交股數1554萬股，金額2250萬元。
慕容小初