劉鑾雄個女友呂麗君（Yvonne）俾今期《壹週刊》影到佢喺英國嘅屋企，經常有唔同嘅男人出入。大劉供Yvonne喺英國讀書，重買間八千幾萬豪宅畀佢住，點知佢學就好少返，重同兩個男子來往頻密。
邊行邊抹嘴
周刊報道話上月中有一個中東男子同Yvonne入咗大劉嘅倫敦豪宅短敍兩個鐘後，個男人走嗰時，重一路行一路抹嘴，一臉回味。到第二日又見到一個講廣東話嘅男人喺大劉屋企走出嚟，上咗大劉送畀Yvonne嘅平治跑車，兩個人重去唐人街飲茶。記者發現喺呢個幾禮拜入面，嗰個男人日日都喺大劉屋企出入，直情當正係自己屋企咁。
大劉真係幾大方，自從Yvonne幫佢生咗個女，就一直畀佢喺英國讀書，好少返香港陪個女同大劉，佢都冇計，不過馮仁昭就覺得Yvonne一個人喺外國住，啲男性朋友喺佢香閨出入，始終唔係咁好，畢竟佢係人哋女友兼係媽媽嘅身份，應該檢點吓，顧吓大劉嘅面子。原本想打電話畀大劉問吓佢嘅反應，點知咁啱佢又出咗埠，搵佢唔到。