卓德舊將董事總經理陳超國,拉大隊加盟一太估價專業部,卓德噚日宣布,委任做開執行董事及首席財務主管嘅趙琰穠接替。 趙總四十五歲,九三年加盟卓德,最初參與發展大陸業務,佢早喺英國攞到執業會計師牌,憑住專業知識,加上早年喺英國嘅國際物業代理工作,累積唔少商廈及財務經驗,幫卓德管數多年,今次走馬上任,亦屬理所當然。 另外,剛過檔嘅陳超國,今早會喺電台開咪,講吓商廈市道。