在澳門極流行的葡式甜品木糠布甸，是繼葡撻同豬扒包後，港人到澳門必捧的特色食物之一。撻同包早就被本地餐廳食店翻版大賣特賣，至於木糠布甸，偶爾亦有本地甜品店做，但講到正宗，始終唔及澳門出品。今回，唔使過海都食得到，在澳門以木糠布甸馳名的沙度娜，剛剛便在旺角開了香港首間分店，食過澳門的木糠布甸，今次可以翻尋味。
記者：招佩珊
攝影：陳偉強
模特兒：Natalie（Salvador）
澳門製造日日運到
木糠布甸（Serradura）是葡國的傳統甜品之一，在澳門的流行程度不比葡撻輸蝕，以往要到酒店或餐廳才可一嘗的甜品，家陣在當地隨街可見，唔單止餅店有得賣，更設有專門店，沙度娜便是其中一間。3年前，在澳門土生土長的負責人之一梁生與他的拍檔，發覺這種用忌廉和餅碎逐層鋪成的葡國傳統甜品，食來食去都係得原味，太單調兼無新意，於是，決定開舖炮製新口味的木糠布甸，例如綠茶、朱古力、曲奇等。香港店賣的跟澳門一樣，6款口味包括原味、朱古力、綠茶、炭燒咖啡、芒果及曲奇；布甸仍然在澳門製造，每日就跟雪藏貨櫃運送香港，保證與在澳門食到的，是同樣的味道。
不同滋味變生日蛋糕
木糠布甸基本是用淡忌廉和煉奶打成，食起來好香滑，加上一層如幼沙般的餅乾碎，冰凍的布甸與餅乾碎在口中溶化，質感介乎雪糕與Tiramisu之間，最好將布甸與餅乾碎撈埋一齊食，可中和甜味。沙度娜從簡單中創出不同款式：杯裝，在澳門店最好賣，最高紀錄每日可賣出800杯；雪餅，兩啖便可食掉一件；還有由一磅起的磅裝布甸，可以用不同味道的木糠，於布甸面撒出不同字款，變成另一款口感的生日蛋糕。米糠布甸，有硬食同軟食兩種食法：一是放置在冰格內，雪得硬硬的，食落似雪糕，就算放耐了亦唔會好似雪糕咁變成一灘水；另一種方法，是在食前15分鐘，放在雪藏格內，布甸軟化了，入口既香又滑。
木糠布甸（4安士）$29
4安士布甸直徑約有5吋，似迷你蛋糕，底面及中間有餅乾碎，食落有層次感，口感最均勻。原味似唔太甜的呍呢拿雪糕，但以綠茶及朱古力的味道則最為突出。
心形木糠布甸蛋糕（約一磅）$108（需一日前預訂）
味道同樣有6款選擇，心形當然係用來冧人。
芒果雪葩（左）$18 芒果茶冰（右）$20
布甸以外的另類選擇，以芒果打成的雪葩，無忌廉無煉奶，健康之選，食咗唔怕肥；茶冰就似思樂冰，但材料換上芒果，又係Sell健康。
芝士木糠布甸$13/杯
芝士味香，似食緊Mousse，墊底仍是入口即溶的餅乾碎，除面層鋪了餅乾碎的原味外，另有芒果及藍莓兩種味道，前者芒果味足，後者的藍莓醬略嫌偏甜，個人還是偏愛原味，鍾意有多啲餅乾碎撈埋食。
杯裝木糠布甸$15/杯
在香港店賣的杯裝布甸，有6種味，但少了芒果味，多了碎果仁，味道同原味差唔多，面及底有薄薄一層餅乾碎，但略嫌份量唔夠，總覺得多啲木糠撈埋食口感正好多。
葡式雪餅$10/件
Size細咗，食一件兩啖搞掂，相對又無咁多餅碎，食落無咁似木糠布甸，雪到硬硬嚟食，反而似食雪糕，口感Creamy好多。
食客有Say
沙度娜香港木糠布甸專門店（23886963）
地址：旺角豉油街60-64號地下A舖
營業時間：
星期日至五1:00pm-11:00pm、星期六1:00pm-12:00mn
座位：6個
