文仔大概９歲，同一般天真活潑細路仔沒有分別，都係咁百厭，都係咁可愛，係我一個顧客嘅朋友個仔，最近被我稱為測試有機菜最佳人體試管。唔知係咪佢啲腸胃特別敏感，佢食一啲落咗農藥嘅菜，立即就會肚瀉，而食有機菜就冇事。最近Jenny至話我知，原來幾年前佢特登拎我種的有機菜，去給文仔試，果然沒有肚瀉，重唔知食得幾滋味，於是以後Jenny向我買的菜，有一半係分畀文仔同佢屋企人食，當然係收番錢啦！「你真係衰！即係唔信得過我嗰啲係真正有機菜啫！」Jenny避開我的襲擊：「我玩吓咋！不過試完之後我都有啲驚，已往我都唔覺得農藥對人體的影響有咁大，我平時食埋食埋，咪食咗好多農藥囉？」其實依照政府規定，使用農藥的蔬菜響７日之內係唔准賣，７日之後待農藥散得七七八八才可出售，基本上應該對人體沒有大害，只係文仔敏感而已。當然對於我嚟講，我自己種的有機菜一定係最安全，最好味㗎啦！（十八）
阿花