遠在紐約的DavidLetterman也拿香港的迪士尼樂園開玩笑，香港的傳媒更是不遺餘力地大踩特踩，香港迪士尼樂園不是香港人的一盤生意嗎？不清楚合約內容細則如何，但迪士尼方面應該係有賺冇蝕，如果蝕的話，蝕的應該是我們口袋裏的錢啊?!香港迪士尼樂園我去過，其實都幾算係咁，太空山、巴斯光年、小熊維尼樂園與立體電影院都幾好玩，有人話唔夠刺激，但係迪士尼樂園從來都係講究老幼咸宜，老幼咸宜就梗係唔夠刺激㗎啦，想要刺激的話就應該去嗰啲六支旗嘅樂園例如MagicMountain玩，擔保嚇到失禁。
有人投訴話排隊排太耐，咁預咗要排隊㗎啦，美國又要排，日本又要排，不過可能喺日本排就多啲日本妹睇，喺洛杉磯排就多啲火辣洋妞睇，時間容易打發啲。
有人投訴話香港迪士尼樂園太細，奇怪，大細同內容精唔精采應該唔掛鈎，曾經去過廣州動物園，平均行一里路先見到一隻動物，行到死死吓，況且有持續發展空間總好過一嘢見底。
有人投訴話香港迪士尼員工好寸，我又撞唔到，不過迪士尼係全世界人氣最少嘅地方之一，乜都係虛構堆砌出嚟，所有嘢建基於制度，美國的管理模式向來都係講架構、講制度，唔講人情味，如果唔講制度，試問咁大嘅國際性項目點去管理？會唔會混淆咗寸同揸正嚟做？
有傳媒報道有人讓小朋友在廁所洗面盆中大便，我相信只係渲染，同類事件應該亦有發生在海洋公園或港九各茶樓。
其實，好唔好玩最緊要係有冇心愛嘅人同你一齊去迪士尼，見佢哋開心，自己就開心，存心去找碴子，不如唔好倒我哋自己米。