紹榮鋼鐵龐鼎元家族，標售中半山麥當勞道半山樓十幾伙收租豪宅，每伙千幾呎，夾埋三萬四千幾呎，市值肯定過億。 呢批貨喺五十年代落成，實用率高，建築設計特別，唔單止住宅咁簡單，重附連二十幾個百幾呎嘅小型單位，本來做司機房及工人房。即係話，以前啲富豪，喺照顧司機工人起居之餘，唔想住埋同一屋簷下。既然買大送細，新買家大可考慮分拆細單位賣，或者租畀啲優皮一族。