如果有間喺香港註冊嘅公司，只顧「一國」，鄙棄「兩制」、違反香港私隱條例，私下出賣用戶個人資料，你會杯葛佢嗎？
今年四月，湖南《當代商報》記者師濤透過雅虎（Yahoo）免費電子郵箱，向境外傳送中國當局嚴防「六四」紀念活動嘅文件後，雅虎竟然向中國當局提供師濤嘅個人資料，搞到師濤俾中國政府以「非法向境外提供國家機密」罪名，判處入獄十年。
香港外國記者協會（FCC）噚日罕有咁向所有會員發出傳真，附上佢哋畀雅虎嘅信件，對香港註冊嘅雅虎出賣用戶私隱嘅行徑深感痛心之餘，亦表達佢哋最強烈嘅不滿，用到「幫兇不可恕」嘅字眼，十分嚴厲。
FCC負責人話，受事件影響，該會來自全球不同新聞機構嘅會員，𠵱家正傾緊係咪集體杯葛雅虎，FCC又要求雅虎嘅創辦人楊致遠盡快就事件作出解釋。
傳真︰2623-9278
電郵︰[email protected]