北青傳媒（1000）承認有員工在大陸被捕後，昨日復牌股價一度跌落9.50元，收10.50元，跌咗19.23％，但成交就唔大，只得130萬股，金額1371萬元。
經紀黃話，北青傳媒早排發布盈利警告，跟住公布業績又唔好，間間證券行都話要沽貨，股價由20元高位跌落嚟，斷估唔少芬佬一早計晒數離場，所以昨日最多都係將貨尾沽埋。
美資行睇12元以上
另外，大陸地產股繼續炒到㷫烚烚，一副高處未算高嘅格局。合生創展（754）股價喺呢個零月內已升咗五成，就快見到10元，昨日又有美資證券行唱好，話隻股可見12元樓上咁講。
經紀黃話，雖然合生升咗咁多，但廣州地產市道向好，加上合生股價較資產淨值仍有大折讓，而貨源相對其他同類股冇咁分散，所以隻股何時見頂真係好難講。
合生昨日微升唔夠1％，收9.50元，成交股數87萬股，金額831萬元。
慕容小初