阿牛曾健成個人民電台前晚突襲成功，喺大氣電波播出節目，不過聽講佢用嘅波段剛好同新城相撞，所以新城台即時去信電訊管理局表示關注。
八方聽聞，電管局正調查有關事宜，如果證據確鑿，就會檢控阿牛，最高罰款十萬元，重要坐五年監㖭。
阿牛以身試法，八方都為佢擔心，皆因佢未必知道當局近年提高咗罰則，入到罪就有排煩。阿牛當然預咗有手尾跟，但佢始終認為大氣電波屬於大眾，香港只有官同商可以搞電台，民間冇份，呢個並唔合理，亦唔符合香港先進、自由嘅形象。
自認係狂牛同癲狗嘅阿牛同毓民前晚好high，阿牛話：「新城台係李嘉誠嘅，佢咁有錢，使唔使霸晒啲頻道唔畀人用」，何況佢都無意踩過界。
阿牛聽日又會再次去廣管局申請開人民電台，如果今次都係唔批，佢話會再次公民抗命直至當局點頭為止喎。
傳真︰2623-9278
電郵︰[email protected]