陳淑蘭早前冇做港台節目主持後，已轉行做ＯＬ，因為佢會加盟中信泰富主席榮智健個堂妹榮智豐嘅投資集團，擔任業務拓展行政總監，榮升高層咁巴閉，蘭子噚日專登去咗中環一間髮型屋剪個靚髮同修吓甲，準備今日返新工，迎接新嘅挑戰。
愛犬變看護
馮仁昭噚日喺髮型屋撞到蘭子，佢早前右腳踭做咗駁腳筋手術，雖然已經拆咗石膏，但重未拆線，所以要用柺杖行路，但蘭子依然貪靚，點都要喺返新工前執執，佢話：「腳傷後我出街，零舍多人望我隻腳，我先至特別搽靚啲。」
問蘭子做乜唔等隻腳好番先開工，佢話：「其實老闆娘榮智豐都有咁講過，佢好體諒我，係我自己要堅持。」問蘭子新工嘅職責做啲乜？佢話：「我會幫手見吓客，份工都幾有挑戰。」
蘭子自從腳傷後，身邊朋友都好關心佢，蘭子話：「除咗一班朋友之外，我屋企隻金毛尋回犬『金珠』都好醒，佢見到我喺屋企唔方便，需要乜就叫佢用個口叼畀我，做咗我個私人狗護士，好抵錫。」