香港離公民社會有幾遠？呢個問題好深，亦好難答，但一班嚟自台灣、北京同香港三地嘅新聞及文化界人士，好似《新新聞》社長王健壯同文化評論員梁文道咁，噚日都喺一個港大主辦嘅論壇上作出詳細剖析，龍應台更擔當主持人，叫座力好強。
結果，呢班講者唔止吸引到好多學生捧場，就連今年大紫荊勳章得主、工業家蔣震都係座上客。蔣生同八方講，自己對社會發展好關心，所以不時都會出席論壇，聽吓其他人有乜意見，絕對唔算稀客。
由於禮賓府裝修緊，搞到今年嘅授勳日都押後咗。八方噚日問蔣生幾時正式攞勳章？點知佢話自己都唔知，亦覺得冇乜所謂。問到佢兩個囡囡，近期喺政壇好活躍，作為老竇，會唔會鼓勵佢哋從政？蔣震就話「女大女世界」，一切都由佢哋決定，認真開明。
傳真︰2623-9278
電郵︰[email protected]