商台節目《左右大局》一周年，梗係要搞搞新意思慶祝一吓。噚日唔少立法會議員，例如田北俊、李卓人、譚耀宗、湯家驊、李華明、張超雄同王國興，都有去個節目度賀壽。
主持李慧玲重同聽眾玩遊戲，首先就叫聽眾估吓，究竟田少同譚Sir銀包入面有幾多現金？結果其實都唔係太大驚喜，預料會喺今日榮升阿公嘅田少，大拿拿袋住五千二百七十蚊出街；有五張金牛撐住，都夠田少使啩。
嚟自勞工界嘅譚Sir又點呢？原來佢個銀包只係得一千四百九十蚊，少過田少成大截，唔知佢係咪都冇田少咁大使呢？
玩完呢個遊戲，又輪到估吓阿人同肥仔明邊個腰圍勁啲。雖然肥仔明有名你叫做肥仔，但原來佢腰圍只得三十六吋半，比起阿人嘅三十九吋半，都重差少少，睇嚟拖住個大肚腩嘅阿人，係時候收吓身喇。
傳真︰2623-9278
電郵︰[email protected]