日股強勁，全日彈升214點，刺激所及，港股下晝開市8分鐘，恒指上到15493，升99點。但此時距離8月份高位只相差15點，回吐壓力大增，落番轉頭，恒指埋單唔見12點。
個別發展明顯，恒指股中，13隻升，12隻跌，8隻冇郁。中銀（2388）係有得升之一，最高15.75元，收15.65元，進帳0.15元。要留意嘅係，是日成交6.51億元，大增1倍半。建行招股在即，幾乎全人類睇好，雖然中銀與建行業務地區唔同，但大家都係紅色一家親，啲財團銀彈先行掟落中銀。中銀個勢未完。
中銀C輪3641：最厲害嘅中銀C輪，係9401，單日升幅57%，有66球易手，收21.3仙。高槓桿率、高溢價輪，只係適合高冒險精神炒家，唔係個個啱。
中銀C輪3641，收15.6仙，升得1仙。明年11月初夠鐘，溢價5.8%，槓桿率10倍（有效6.1倍），引伸波幅21.3%，最適合又想賺錢又怕死或者又痕又怕痛嘅炒家落手。
國壽C輪4702：國壽（2628）收6.05元，跌1格，趁低買C輪，對象係4702。
隻輪明年1月中夠鐘，輪價33.5仙，溢價6.5%，槓桿率17.8倍（有效9.5倍），引伸波幅26%。
章盛