周末突然有西九樓盤推出，據講賣出幾十伙，頂樓單位售價（呎價）高達一萬八千蚊，其他單位呎價近七千五至八千。以七千五計，一個一千呎單位要七百五十萬，借七成供二十五年，按揭利率五厘，每月供三萬四千六百幾蚊，一般資產階級唔易捱。不過報紙訪問一位阿太，阿太話靚單位嘅呎價一萬，都好合理啫。香港啲闊太何其多也，唔知佢哋好嘢還是佢哋老公識得賺錢，總之令左丁山一輩男人汗顏。
對投資素有研究嘅中大教授劉創楚話香港樓市二元化：便宜單位供過於求，豪宅（一百平方米以上）求過於供，於是儘管豪宅樓價上升，政府唔會受到社會壓力。既然香港有咁多富戶，豪宅價格節節上升，算數啦，唔好嘈樓價貴。
劉博士話香港私樓之中，面積超過一百平方米嘅，只有八萬三千間，家庭收入多過五萬元嘅有二十五萬戶，故此需求係千呎樓宇供應量嘅三倍。呢一點，左丁山不敢苟同。算你月入六萬，千呎新樓要賣七百五十萬，借按揭四百萬嘅話，月供二萬六千三百九十八（二十年，五厘），等於稅前收入嘅44%，加埋薪俸稅、管理費、差餉，五成或以上收入已經冇咗，一家三口嘅支出要好小心至得，如果樓價係一萬元一呎，六萬元戶重會捱到金睛火眼至掂，奉勸四十歲以上，三人家庭每月收入低於七萬嘅，無謂諗買一層一千萬銀嘅單位。
之不過，香港統計處啲家庭收入調查，相信嚴重低估咗，又或者好多人密密賺錢，根本唔使報稅，否則豪宅單位一話開賣，邊會有成四萬人去參觀㗎，當豪宅係迪士尼咩。公僕有鐵飯碗，做到助理署長嘅人唔係好多，月薪十二萬零啫（如記憶有誤，請指正），呢個收入水平嘅人，肯唔肯拎六七萬銀一個月出嚟供樓？左丁山只能達致一個結論，一般打工仔冇資格買呎價萬元或以上嘅豪宅，大家如果冇taxableincome以外嘅收入，無謂羡慕人哋。