楊愛瑾（Miki）同鄭中基一段緋聞，似乎隨住電影《龍咁威2之皇母娘娘呢？》落畫之後告一段落，就連早前兩個有影皆雙蒲吧嘅日子亦已不復見。
噚日凌晨，Miki同班朋友一齊去中環開P，同場就唔見鄭中基蹤影。唔知係咪因為咁嘅關係，所以Miki全晚都冇乜笑容。
噚日凌晨約一點，打扮隨意嘅Miki同大班朋友聚集喺中環歌賦街一間新酒吧消遣。其實間吧未正式開業，連招牌都未掛上去，不過門口就黐咗張寫住「privateparty」（私人派對）字樣嘅紙牌。
開餐廳交流意見
酒吧內，只見Miki同一位女性朋友排排坐，身邊重有四、五個男伴，不過Miki個樣就好慵懶，一時揭書睇、一時又成個人攤喺梳化度，冇厘心機。到凌晨大約三點左右，成班人先至散band。
不過Miki噚日就解釋因為有朋友就嚟開夜店，所以邀請佢同成班朋友去試吓菜。Miki重話自己開餐廳，可以同朋友互相交流意見㖭。
