信置（083）推出「一號銀海」，英文字宣傳語句係OneVisionOneDreamOneSilverSea，文字結構同王德輝遺囑OneLifeOneLove有啲相似。呎價7500至1.8萬元，位於大角嘴嘅樓盤，賣到咁嘅價，有人拍拍吓額頭，明白信置點解上周二志在必得搶奪海庭道地皮。
樓市將來係點，將來嘅事。信置即彈0.30元，收9.75元，升破7月高位，做咗最大升幅恒指股。信置C輪5件，升幅14%至30%。信置C輪交投好疏，轉身唔易。賭雞仔注，贏隻糯米雞，買4968。
新地C輪3906：信置掂檔，新地（016）唔會立地成佛，昨收80.50元，升得0.15元，趁佢喺低位，買C輪。
由數據角度揀對象，始終都係上周提嘅3906抵食。隻輪年底夠鐘，輪價44.5仙，溢價只係2.4%，槓桿率有18.1倍（有效10.8倍），引伸波幅23.4%。上周五只有5.8球易手，昨日增至近20球，識貨之人埋緊位。
想熱鬧，則揀最多買賣嘅4904。
恒地C輪9187：信置好，新地好，恒地（012）唔會唔好。恒地C輪冇乜可以選擇，9187勉強可以。明年4月下旬到期，輪價25.5仙，溢價6%，槓桿率有15.3倍（有效8.2倍），引伸波幅22.5%。
章盛