早排多間證券行先至話賭王位大小姐揸fit嘅信德集團（242），因為業績唔理想要沽貨，但轉個頭證券行即刻轉軚，話信德向大小姐購入澳門地皮，同置地合作呢個項目好到不得了，紛紛調高番信德目標價。眾大行轉身咁快，真係想跟都唔容易。
經紀黃話，證券界從來都係向前望，先排美國佬投訴澳門的洗黑錢活動，一度令濠賭股受挫，但轉個頭有新消息，芬佬又好靈活地埋位炒番轉。信德昨日升3.5%，收6.65元，成交股數751萬股，金額4959萬元。
經紀黃又話，信德現價同證券行估計的目標價，仍然有好一段距離，稍後股價仍可再上。
除咗信德外，卓能（131）近日亦公布，話用咗8億銀喺澳門買地，跟住上周五又公布全年勁賺3.73億元，增加11.95倍，隻股噚日大升8.29％，收4.90元。
經紀陳話，雖然卓能老闆話暫時無意配股，但偏偏外間就有傳聞，話久未見異動的卓能，可能有集資行動。卓能股價近日持續處於高位，市場有此傳聞並唔奇。
慕容小初