港股在逼近15500大關前，連續兩日進行整固，噚日恒指在窄幅內上落，收15394，跌34點，成交減到178億元。期指較強，收15432，跌8點，高水38點。
大藍籌仍係和黃（013）最勁，收80.60元，升0.35元；中國移動（941）則唞氣，收37.65元，跌0.35元。滙控（005）重係遭力壓，收126元，跌0.20元，臨尾本來126元已掃清，但大行又拿拿臨掛到成球沽盤，大戶要㩒到何時何日，唔知，但後市看好，其他大藍籌已經喺上一個升浪擔當重要角色，遲早輪到滙控發威。
其實，滙控在124元至128元間橫行兩個多月，近日走勢已有轉好迹象，只要升穿126.20元，即可確認同時升破10日、20日同50日線，及中期下降軌，升浪再展，第一個目標係128元，呢個係長期下降軌所在，整固後再上，則確認大圓底收集完成，下一個目標指向138元。
滙控最近整合信用卡業務，將亞太區信用卡收單業務56%權益售予GlobalPayment，作價6720萬美元，並將餘下44%注入與GP所組合營公司。高盛證券報告指滙控透過合作可提升技術，獲得槓桿效益，以取得更多業務。高盛維持滙控優於大市評級，目標價為146元。
滙控自宣布中期業務後，好多大行都調高其目標價，但滙控今年一直跑輸大市，主要係大戶的部署中，未輪到由佢發力而已。
滙控05年（12月年結）上半年，獲利590億港元（下同），升9.5%，全年預測1120億元，每股盈利9.97元，滙控現價126元，預期PE12.6倍，比外國同業平均約13.8倍為低。
C輪中4869最抵買
滙控要發力，只要追番同業嘅平均PE，股價已可見138元。
看好滙控，C輪之中，有好多選擇，花多眼亂，但最抵買嘅，4869應係其一。4869認股價126元，12月28日到期，噚日收0.245元，溢價1.94%，槓桿率51.4倍，滙控若確認破位而上，4869升勢會好有爆炸力。未來兩個月，滙控股價若升上138元，4869平水計可見1.20元，升幅以倍計。
郭兆誠