財務Ｌ與老闆到雲南旅行，受盛情招待，到香格里拉觀光，覺得風光秀麗，不虛此行，唯獨位處高山地帶，空氣稀薄，唔多習慣。回程之日，天和日麗，藍天白雲，睇住架車重有五分鐘就到機場，心情輕鬆之至，於是鬆開安全帶，伸伸懶腰，舉頭望吓沿途之靚景。
弊，就在呢個時候，司機唔知係唔係心情靚得滯，搏命踩油門，在直路上飛車，財務Ｌ與老闆想話大聲喝住，都未喝得切，已經撞上前面嘅車，跟住撞壆，車門彈開，財務Ｌ因冇扣安全帶，飛出車外，撞到一仆一碌，在地上動彈不得。架車停低之後，老闆在車內撞崩頭，好彩冇其他傷口。
一個鐘頭後，救護車卒之到場，救護人員將財務Ｌ對腳用夾板夾實，慢慢抬上車。入到所謂醫院，一位「醫生」擔住口煙，行入救傷室同佢哋包紮，財務Ｌ睇見，更加暈上加暈。
佢哋如何以第一時間安全返嚟香港，不必細表。返到嚟，第一時間入醫院，醫生發現財務Ｌ對腳冇斷骨，乃不幸中之大幸；至於佢老闆，傷口發炎，原來內地救護人員用嚟包紮傷口嘅紗布，唔夠乾淨，疑有細菌在內喎。
上星期成班老友聚頭，輪到財務Ｌ請客，佢用枴杖支撐，行入酒樓房間，眾人大驚，忙問發生何事，佢慢慢細說意外，自言夠運，啲老友自然祝佢大難不死，必有後福。
左丁山將呢件事講畀大編輯聽，大編輯為之苦笑，佢一位長者親戚到加拿大探親，小住三個月之後，精神好晒，面色紅潤，健康甚佳，點知返嚟香港之後，與成班老友到內地行街食飯，返到嚟就入咗醫院，在加拿大休養三個月，前功盡廢，香港醫生懷疑佢喺內地食咗不潔食物。住得加拿大耐之人，慣咗清潔，可能抵抗力薄弱，返到內地，就分分鐘病從口入。