睇見Sabrina同Marco眉來眼去就知佢哋有「景轟」，會唔會有進一步發展，就要睇佢兩個肯唔肯踏出多一步，當然我都一定會幫呢個老同學。佢成日借啲意上嚟幫我湊女，其實係想見Marco就真。呢個禮拜日，佢又話上嚟探囡囡，我就順水推舟約埋Marco上嚟，等佢哋見多幾面，而我就可以同老公過吓二人世界啦！
點知出門口唔夠一個鐘，Sabrina好緊張咁打嚟話囡囡屙咗兩次，即刻飛車返屋企睇吓乜事。返到屋企即刻畀啲電解質飲品囡囡飲，每公斤體重就以10毫升的口服電解質液體補充水份。因為但凡嘔吐或肚瀉，第一件事就係要防止脫水，反而止屙係其次。之後再餵葡萄糖水去補充體力，等佢屙多一兩次就冇事。不過Sabrina嚇到眼濕濕以為自己做錯事，其實近日天氣開始轉，除咗容易引起呼吸道疾病，亦好容易感染腸胃病，尤其係兩歲以下嘅BB。呢個時候Marco就表現佢溫柔嘅一面，搭住佢膊頭安慰佢，呢一刻佢兩個四目交投，感情似乎進咗一步，囡囡今次間接成為紅娘㖭！（七）