上周發生中科環保（351）同埋中國環保電力（290）停牌事件，小初原本以為三四線股有排冇運行，但凡事都有例外，前個星期六提過金龍船（318）市值80億元，隨着股價由1.49元升至1.76元，市值進一步升至96.8億元，真係唔到你唔服。
經紀陳話，呢間市值近百億嘅公司，家陣主業仍然係做緊酒樓生意，雖然公司早排話發展大陸典當生意，但好似仍未落實，就算真係搞得成，亦要考慮利錢係咪豐厚到可以支持隻股家陣近100億的市值？
經紀陳又話，隻股近日成交金額明顯大咗好多，日日都有成千幾兩千萬元，江湖傳聞炒家搵到新幫手，所以場面先至咁熱鬧。
另外，早前業績唔錯嘅大陸地產代理合富輝煌（733），近期趁股價處於高位批股，公司本身集資5000幾萬銀，而兩位董事賣舊股，夾埋亦套現千幾萬元。
經紀黃話，據講今次配股，係有星洲芬佬睇好接貨，並唔係派通街，復牌就算股價有波動，亦不宜睇得太淡。
慕容小初