博羅205國道昨凌晨發生五死兩傷車禍後，附近幾百名村民聞訊趕到現場，原本打算救人，但未能將已撞至變形的房車車門拉開，結果救人不成，村民轉而將肇事貨車上運載的十多噸柑搶個清光。「村民本嚟係來救人嘅，但聽到有柑執，結果咪好多人來執柑囉！」目擊事件的七十歲雷公村村民陳婆婆說：「初時村民都係執拾路邊嘅柑，但後來嘅村民執唔到咪爬上車去搶囉！」
取來水桶竹籮載柑走
「冇幾耐就好多人返屋企攞水桶、竹籮同布袋過來裝！後來警察到場，都冇人得閒理，結果村民又去搶囉！」陳婆婆又說：「我都未見過咁熱鬧場面！」她指出，村民聽到一聲巨響，得悉是發生車禍後，很多村民趕到希望幫忙救被困車中的傷者，但後來愈來愈多村民趕到，才發生搶柑事件。
消防員後來趕到場，用電鋸將變形的車門鋸開及抬出五名死者屍體，陳婆婆說：「好恐怖！有兩個好似肉餅咁，屍體撞爛得好緊要，滿地都係血，當時搶柑嘅村民都嚇得唔敢行近！」她補充說：「後來有人用白布冚住屍體，村民又再上車去搶柑！當時有警察叫唔好搶，但冇人聽，我見到個貨車司機儍咗咁，任由村民上車執柑！」記者見到肇事現場仍遺下大批柑，陳婆婆說：「嗰啲係有血㗎！邊有人敢要呀！」
本報記者