Josephine個八妹又打嚟打聽佢表妹Sabrina同我表哥Marco嘅戀事，我笑佢咪掛住八人哋，顧掂自己先啦！聽佢講懷疑追求者Dennis一腳踏幾船，咁唔專一真係早走早着，費事虛度青春啦！忽然醒起公司個會計師John最近好以甩咗拖，可以試吓撮合佢哋喎。
今日返到公司，我未開口先畀John窒幾句：「生完女好心你就Keep吓啦，因住你老公飛你呀！」佢唔知係咪開始中年發福先至畀女友飛，所以將個問題投射喺我身上。心諗你估我唔想減肥咩，一來我唔鍾意做運動，二來又唔可以節食，因為我𠵱家要餵人奶，都想BB吸收更佳嘅奶汁及營養素，食煙飲酒節食通通都唔得，重要多攝取水份，同埋多吸收鈣質、鐵質、維他命，反正老公都鍾意我有肉地，奈我唔何！不過連徐濠縈都話餵人奶會瘦得快啲，點解我個肚腩重好似有咗三個月咁大呢？（六）