九月二十九日《文匯報》刊登半版頭版廣告，係四川大學一百一十周年校慶公告（第一號）。廣告開頭幾句當然係讚頌之詞，好有新中國文采：「岷峨挺秀，錦水含章。巍巍學府，世紀輝煌。2006年金秋時節，四川大學將迎來110周年華誕。屆時，四川大學將隆重舉行建校110周年慶典。」開頭四句，十分古典，跟住就係《人民日報》式報道，見慣就唔會覺得驚奇。
公告附英文文稿，雙語並用。一睇，陶傑、古德明、鄧永鏘可以大做文章。第一句英文係：「LikethedistantMinshanMountainandEmeiMountainsotallandgraceful,alongbankofthepoeticBrocadeRiver,standsSichuanUniversitysomajesticwithcenturyglory.Inthegoldenautumnof2006,theuniversitywillbegreetingher110thanniversaryandholdingagrandcelebrationceremonythentocommemorateherfounding110yearsago.」
學陶傑話齋，有啲中文意境係好難翻譯嘅，例如「金秋」譯做goldenautumn，相信鬼佬會睇好耐先至明白。突然間想起，「金風送爽」應該點譯？左丁山諗咗好耐都覺得辭不達意，呢勻真係知道自己冇乜墨水。
四川大學公告第二段末，有兩句內地八股，又係譯死人：「譜寫了一曲曲中國現代大學繼承與創新並進、光榮與夢想交織的輝煌樂章。」英文係：「havingcomposedsplendidchaptersofgloryanddreamofmodernChineseuniversitiesinmakinginnovationwhileinheritingtradition.」
劉紹銘教授不如喺佢嘅「星期日名采」專欄雅正之，等我哋呢類水皮友學吓嘢。
因為中國興起，世界大公司爭相與中國做生意，最初係需求英譯中人才，翻譯系學生可以應付。但中國發財之後，好多機構要擴闊國際網絡，與外國接觸，進軍世界市場，與外國公司交往仍以中文為先、英語翻譯為輔，於是國內外公司機構都搶中譯英人才，咁就杰咯，佢哋發覺唔係以英語為母語嘅翻譯學生，中譯英嘅水平不如理想。嗱，四川大學嘅中譯英，一睇就知道係硬翻譯。各位中英兼優之文科學生，搞好中譯英，將來唔憂冇工做。