北上做大騷，當然要出位。所以班議員都好想可以當面詰難張德江。可惜前綫卿姐，最後都係無緣提問，難怪佢都幾勞氣，話主持人范太唔叫佢。
八方聽范太講，嗰日點名叫人提問，查實大有玄機，先係要達致均衡參與原則，所以幾乎每一個黨派，都有代表發言；其次要梅花間竹，唔好一次過被某派別壟斷晒，都幾考功夫；但對范太呢位「熟手女工」嚟講，搞呢亭扮公道嘅嘢都唔係太難，佢重講咗當中好多得意之處。
首先，佢話三大黨主席發言後，望過去只見萬「暗」叢中一點紅，結果着到成個pinklady嘅譚香文，就有幸成為第四個發言人。至於長毛點解得呢？原來同佢勤力有關，事關范太每次點人，長毛隻手都高舉，唔叫佢都唔得啦。
長毛同楊森問完，佢都想畀卿姐問，點知睇睇個鐘，竟然問咗成個鐘，比原定時間長一倍，惟有叫停，卒之就犧牲咗卿姐，搞到佢呱呱嘈。
傳真︰2623-9278
電郵︰[email protected]