呢期國慶活動多到暈，但貴為特首夫人嘅曾鮑笑薇，都唔係個個捧場；不過，如果由婦女團體舉辦，就真係點都要到一到撐吓場啦。
好似噚晚婦協喺無綫舉辦嘅國慶晚會，曾太都以一襲淡淡嘅粉藍色繡花旗袍登場，再加上其他出席嘅重量級婦女貴賓打扮到花枝招展咁嚟捧場，好似唐媽媽嘅金裝新款旗袍、董太嘅黑色有型長褸，以及霍英東太太藍黑中帶閃閃令嘅旗袍等，真係令現場貴氣十足㗎。
八方見到唐媽媽，梗係要問吓唐唐腳腫有冇好轉。一問之下，發現唐媽媽真係愛子情深，原來佢噚日由美國返港後，已即時去探咗唐唐，發現情況好咗啲，唐媽媽先安樂啲咋。
不過，好番還好番，唐媽媽話，唐唐雙腳依然腫腫哋，所以都係唔方便着鞋喎。
傳真︰2623-9278
電郵︰[email protected]