憑演《妙手仁心Ⅲ》小男人角色向眾仁醫生而出位的曹永廉，每月平均收入不超過兩萬，現年四十一歲的他想兩年內結婚、請家人去旅行，無一不需要用錢，他明白娛樂圈先有名才有利的遊戲規則，這日曹永廉在陽光照射下，自信滿滿地說：「希望有一日可以做到林保怡！」
若不是曹永廉親口證實，真不敢相信外表還像大男孩的他，原來已經四十一歲。曹永廉以前一直報細五年，虛報自己是六九年出世，是甚麼原因，令他決定不再扯謊？
「冇資格揀戲做」
曹永廉說：「個個估我三十歲，冇人估我多過三十五，但我唔想再鬼祟，唔想再呃人，唔想心理上有包袱，好似我以前拍過幾次拖都冇公開，咁就代表事業會成功咩？我唔想再講大話粉飾自己，好似我以前做過清潔，咁就代表我以後冇得發圍喇咩？」
曹永廉在《妙手仁心Ⅲ》中憑住小男人向眾仁醫生一角出位，確實可以說是發圍了，但能令人氣持續，才是關鍵所在。曹永廉說：「我𠵱家嘅目標，當然係想做到第一男主角，𠵱家最多都只係做到第二，我希望有一日可以做到林保怡咁，我呢個年紀，已經係許勝不許敗，一定要衝，但我亦知道自己未有資格去揀戲做，或者要求太多，所以每次機會嚟到我都好畀心機。」
問曹永廉可有想過有一日攞無綫「最受歡迎男主角」獎項，他說：「其實觀眾留意到我已經OK，獎項只係認同，而且咁多演員點會分到我呀，我呢排信心係強咗，但同攞獎嘅距離重差好遠。其實我曾經好想要名利，但得唔到時會好失望，有一段時間我好唔開心，係人都想做一哥，但唔好迫自己，就算做足晒，都唔一定爭到，呢啲唔係自己嘅控制範圍。」
曹永廉九四年出唱片做歌星，入行十二年，雖然現時是無綫小生，但是他的收入，或許比一個有同樣資歷的打工仔低，據知現時曹永廉在無綫人工只得萬多元，加上外快，平均每月收入亦不超過兩萬，他又要租屋、又要養車、還要供養父母，很難想像他如何分配財政。
「一次人生高峯」
曹永廉說：「今次算係入行以嚟得到最多認同嘅一次，算係我人生嘅一次高峯，但係搵錢嚟講唔算多，打電話嚟問價就多咗，真正落實嘅最近都係五單左右。我𠵱家嘅收入，要畀屋企、租樓、車費同埋食，其實唔多夠，但我係一個好慳嘅人，所以夠用。我𠵱家嘅知名度同經濟狀況係唔成正比，喺娛樂圈嚟講，先有名再有利，所以我𠵱家要嘅係機會，我希望有多啲人識我，紮好啲根先講錢，錢方面夠用就得，我唔敢要求咁多，其實𠵱家已經比以前好，因為𠵱家嘅巿道差咗，收入未必多咗，但job嘅價錢就升咗。」
