講到徐克，大家馬上會諗起《蜀山》、《黃飛鴻》系列等一眾唯美式武俠電影；不過筆者亦喜歡徐克近年轉型，玩拳拳到肉嘅《散打》！最新落場DVD《七劍》，可以話集兩個時期的大成；梁羽生的古典武俠故事，運鏡、人設、場景，美得叫人目不暇給。起用大量新人，七把神兵利刃，幕幕有如斬瓜切菜的武鬥場面，打足2.5小時，今個星期絕對必睇！
記者：許福合
DVD版：$89
DVD限量版：$95（送電影繪製手稿七張及硬皮封套）
VCD版：$38
《七劍》其實是由梁羽生經典武俠小說《七劍下天山》改編而成。不過睇落電影，好似只係借用劇中的人物同名稱，故事同小說關連不大。《七劍》係近日碟迷網上熱評的一套電影，好多心急人9月中都入了「國內DVD版」，開碟後嚇然發現好多斷手斷腳的殺人場面，竟然用電腦效果霧化了，據稱可能是國內電檢尺度問題所致！不過大家放心，今次港版3區絕對係「白刀子入、紅刀子出」嘅「狠殺版」，徐克迷包冇投訴；另外發行方面最近在旺角山東街及西洋菜南街交界某DVD舖，擺放了七把神兵嘅模型，經過時不妨睇睇實物！
打鬥場面夠寫實
雖然《七劍》內打鬥場面連場，不過就無用咩嘢電腦特技之類，反而睇落屬寫實派風格，刀刀實牙實齒，如前段女殺手，大燈籠俠士，以及一老一女於石溪與鐵騎打鬥，都見到使用「真功夫」，尤其七劍出場後，神兵利器更厲害，刀刀斷手斷腳，睇落真係相當逼真！
尤其睇厭咗慢鏡式拍攝手法，《七劍》以快打快，配合大量目不暇給複雜招式，唔使高來高去，已經令人睇到緊張刺激。有一場由龍劍楚昭南與風火連城嘅大戰，就最令人有深刻印象，喺高牆窄巷間打鬥，專挑企唔穩嘅地方打，觀眾睇得爽快，不過就相當考驗演員們「功力」，難怪係Disc2Bonus內，睇到唔少演員都要預先經武指練習過各場打鬥先正式開拍。
反派搶鏡主角造型老土
雖說觀眾睇此片，旨在打得勁打得痛快，不過長達2個半鐘影片點都要有故事方向，故事算係普普通通，無咩新意，反而值得留意嘅係人物設定平衡。一眾反派造型設計實在無得彈，有啲重好出位㖭，相反一眾「主角」設計實在太平民化，加上部份演員知名度唔高，有時真係分唔清究竟佢係主角定係二打六。
講到正、反雙方戰力，感覺有一面倒之勢，事關係正方有7把神兵，打得特別勁抽，尤其係神兵第一場發威，更係斬豆腐咁以一敵眾，唯一夠抽只有片尾的「大佬」，算係有還手之力。《七劍》雖然連個名都用七劍，不過戲內想睇清楚呢7把劍無咩機會，唔係大特寫就係太遠，描寫較表面。
同場加映
《蝙蝠俠－－俠影之謎》開戰時刻
《蝙蝠俠－－俠影之謎》！英文係《BatmanBegins》所以有部份人譯「開戰時刻」，不過點解重係「開始」呢？原來本集係蝙蝠俠系列嘅前傳。雖然觀眾評價有好、有壞，不過票房仍然高開，證明蝙蝠迷嘅忠心程度！
今集筆者覺得唔錯，每個反派或正派角色都有完整描述，加上大量動作場面，飛車追逐、爆破，畫面效果都相當唔錯，以及唔少得高科技產品，及至型仔蝙蝠車，都係戲中焦點。DVD版雙碟裝，Disc2Bonus更有漫畫睇，加上好多蝙蝠俠裝備介紹，重好睇過Disc1！
