神州數碼（861）7月以嚟調整近19%，同系統聯想（992）同月以嚟一支箭升咗65%，神州數碼可以諗諗。
睇往績，神州喺非典肺以外正常時期，年做百億銀生意，純利率唔超過2%，感覺上，呢家IT產品分銷商，利潤好似榨出嚟。但要咁睇，神州新近公布06年度首季業績（6月止），純利升幅達27%到2950萬銀。再講，神州02年度營業額105億銀，05年度已經翻半番到154億銀。家陣集團喺祖國擁有6000個以上營銷渠道，網絡已經坐大；況且，IT產品分銷業係薄利多銷，想入場嘅講就易，神州營業額愈做愈大，好反映出呢個網絡大優勢。生意keep住滾得大，薄利唔成問題，照計神州本年度PE有望落到8倍水位。再講，呢期聯想狂升，神州有同氣連枝概念，參考美林目標價2.88元計，回報率28%。
東方表行有資產墊底
東方表行（398）最近半年喺1.5元至1.6元橫行打底，呢隻股可以冷敲，又講兩點：第一，零售股俾貴租金蠶食利潤，業績認真唔alright，所以，今期10.1黃金周，呢類股份幾乎死晒火。但要咁睇，東方表行擁有自家舖位，租金成本無點影響集團，況且，經濟好轉，港產客情傾奢侈品，對東方表行本港生意有支持。第二，呢期有同類企業招股上市活動，就算10.1冇得炒，東方表行或享有新股上市牽動效應。東方表行NAV2.6元，現價（1.55元）有達4成折讓，折讓水平繼續大過呢期已經狂跌嘅零售股，有資產墊底，相對安全。
錢雋