張栢芝前晚在中環出席化妝品宣傳活動，她的老外男友Jeroen亦有撐場。栢芝接受訪問時大讚Jeroen性格溫柔單純，十分害羞，又表示Jeroen指她吸煙十年像煙灰缸，栢芝表示戒煙很有難度，但已開始減少吸煙量。
張栢芝、傅天穎（奀妹）夫婦、李蘢怡、袁潔瑩、陳見飛和鄺美雲等，前晚在中環出席向華強和前妻丁珮所生的女兒向均羚代理的日本化妝品Ex-beaute宣傳活動，栢芝應好友向均羚邀請做產品見證人。
LV店掃貨
近日正在蜜運中的栢芝，與老外男友Jeroen有影皆雙，Jeroen前晚執到正撐女友場。丁珮以國語在台上介紹化妝品時，栢芝覆述：「佢話見我咁靚，咪用埋呢個粉底化妝。」栢芝又表示這次當見證人酬勞可觀，她說：「日本化妝品公司老闆日前嚟咗，佢帶咗我去ＬＶ店，重送咗七萬幾蚊禮物畀我。」日本化妝品公司老闆前晚又送栢芝首飾，她即說：「值成幾十萬。」
談到老外男友Jeroen，栢芝讚不絕口：「佢溫柔單純，好怕醜，男友話我似煙灰缸，我為咗佢半戒煙，我始終食咗十年，都有難度，所以同佢一齊時就會盡量少食啲。佢每日都要我飲果汁，重叫我少啲飲可樂同咖啡，佢話冇益。」栢芝有意在二十八、九歲時懷孕，她說：「不過我又未必同佢（Jeroen）生仔，我冇話會閃電結婚，但緣份到就好難講。」
讚舊愛乖仔
既然栢芝大讚老外男友Jeroen乖仔，莫非她認為所有舊愛都不乖？她說：「以前嗰啲都乖，不過俾傳媒寫到有咁衰得咁衰。因為我紅，雜誌為增加銷路咪寫我衰啲。」對有報道指栢芝為老外男友Jeroen，要弟弟栢文和豪龍搬到居屋，她說：「豪龍搬去將軍澳同女友同居，佢好努力工作，不過運氣冇我咁好。而栢文冇做健身教練啦，佢得二十歲仔，梗係鍾意玩。」在活動後，老外男友Jeroen在後門乘的士離開，而栢芝則與丁珮往半島食飯。
此外，向均羚前男友葉駒騰（Clayton）近日被踢爆與英皇高層霍汶希（Mani）拍拖，向均羚說：「我哋兩個月前分咗手，分手唔代表失戀，係兩樣嘢。我唔知佢同Mani拍拖，Clayton冇提過，不過我哋分手亦是朋友，我𠵱家身邊都有追求者。」問到可會與Clayton復合，她說：「未來嘅嘢冇人知，或者十年後復合。」向均羚又自稱今次投資達數千萬，但資金並非家人支持，她說：「我都二十九歲女，咁大個人自己搞掂。」
採訪：何永寧
攝影：何榮亮、娛樂突發組
