星爺周星馳最鍾意一個人喺中環踩單車，前晚七點左右，又俾馮仁昭撞到佢喺中環雲咸街踩單車。
守法推車過馬路
星爺戴住頂鴨嘴帽同口罩，所以唔係咁多途人認到佢，佢踩住架單車直衝落斜路，去到馬莎對開嘅行人路口時，差啲撞到個女途人，好彩個女人好似元秋咁有番咁上下功夫，一閃就閃開咗，但就忍唔住對住星爺破口大罵：「有冇搞錯！」好明顯佢唔知呢個差啲撞到佢嘅人，就係鼎鼎大名嘅周星馳。
星爺差啲撞倒人，又見有記者影晒相咁，惟有好無奈咁落車推單車過馬路，梗係啦，話晒香港嘅交通規例，規定踩單車過馬路時一定要落車推，俾人影到手車咁差已經夠瘀啦，重俾人影到違反法例就唔好啦。
差啲俾星爺撞到嘅女人，見到記者影相就好好奇咁問個單車友係邊個嚟，知道係周星馳之後，就好長咁「哦」咗一聲，似乎乜嘢火氣都散晒。
